You are here: Home / featured / ਸੰਗਰੂਰ ‘ਚ ਸ਼ਰਮਨਾਕ ਕਾਰਾ, ਪੀੜਤਾਂ ਵੱਲੋਂ ਭੁੱਖ ਹੜਤਾਲ
ਸੰਗਰੂਰ ‘ਚ ਸ਼ਰਮਨਾਕ ਕਾਰਾ, ਪੀੜਤਾਂ ਵੱਲੋਂ ਭੁੱਖ ਹੜਤਾਲ

ਸੰਗਰੂਰ ‘ਚ ਸ਼ਰਮਨਾਕ ਕਾਰਾ, ਪੀੜਤਾਂ ਵੱਲੋਂ ਭੁੱਖ ਹੜਤਾਲ

ਜਿਲ੍ਹੇ ਦੇ ਪਿੰਡ ਦੁੱਗਾਂ ਵਿੱਚ 16 ਅਪ੍ਰੈਲ ਨੂੰ ਦਲਿਤ ਵਿਧਵਾ ਔਰਤ ਦੀ ਪਿੰਡ ਦੇ ਦੋ ਵਿਅਕਤੀਆਂ ਵੱਲੋਂ ਕੀਤੀ ਗਈ ਕੁੱਟਮਾਰ ਕਰਨ, ਕੱਪੜੇ ਪਾੜਨ ਤੇ ਜਾਤੀ ਸੂਚਤ ਸ਼ਬਦਾ ਕਹਿਣ ਦੀ ਘਟਨਾ ਦੇ ਦੋਸ਼ੀਆਂ ਦੀ ਗ੍ਰਿਫਤਾਰੀ ਨੂੰ ਲੈ ਕੇ ਅੱਜ ਇੱਥੇ ਅਚਾਨਕ ਪ੍ਰਬੰਧਕੀ ਕੰਪਲੈਕਸ ਅੱਗੇ ਪੀੜਤ ਔਰਤ ਚਰਨਜੀਤ ਕੌਰ ਤੇ ਉਸ ਦਾ ਲੜਕਾ ਜਗਦੇਵ ਸਿੰਘ ਭੁੱਖ ਹੜਤਾਲ ‘ਤੇ ਬੈਠ ਗਏ। ਪੀੜਤ ਪਰਿਵਾਰ ਨਾਲ ਵੱਡੀ ਗਿਣਤੀ ਵਿੱਚ ਪਿੰਡ ਦੁੱਗਾਂ ਦੇ ਲੋਕ ਸ਼ਾਮਲ ਹੋਏ।ਪੀੜਤ ਔਰਤ ਵੱਲ਼ੋਂ ਆਪਣੀ ਹੱਡਬੀਤੀ ਬਾਰੇ ਦੱਸਿਆ ਕਿ ਪੁਲਿਸ ਵੱਲੋਂ 24 ਅਪ੍ਰੈਲ ਨੂੰ ਦੋਸ਼ੀਆਂ ਖਿਲਾਫ ਮੁਕੱਦਮਾ ਦਰਜ ਕੀਤਾ ਗਿਆ ਸੀ। ਐਸ.ਐਚ.ਓ. ਲੌਂਗੋਵਾਲ, ਡੀਐਸਪੀ ਸੁਨਾਮ ਤੇ ਡਿਪਟੀ ਕਮੀਸ਼ਨਰ ਸੰਗਰੂਰ ਨੂੰ ਲਿਖਤੀ ਪੱਤਰ ਦੇ ਕੇ ਦੱਸਿਆ ਗਿਆ ਸੀ ਕਿ ਦੋਸ਼ੀ ਸ਼ਰੇਆਮ ਪਿੰਡ-ਪਿੰਡ ਘੁੰਮ ਰਹੇ ਹਨ ਤੇ ਵੱਖ-ਵੱਖ ਤਰੀਕਿਆਂ ਨਾਲ ਧਮਕਾ ਰਹੇ ਹਨ। ਇਸ ਪਰਿਵਾਰ ਦੇ ਨਾਲ-ਨਾਲ ਗਵਾਹਾਂ ਦਾ ਵੀ ਪਿੰਡ ਵਿੱਚ ਰਹਿਣਾ ਦੁੱਬਰ ਹੋ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਡੀਐਸਪੀ ਸੁਨਾਮ ਜਾਂਚ ਪੜਤਾਲ ਦੇ ਬਹਾਨੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਤੋਂ ਟਾਲਮਟੋਲ ਕਰ ਰਹੇ ਹਨ।

ਭੁੱਖ ਹੜਤਾਲ ਕੈਂਪ ਵਿੱਚ ਪੀੜਤ ਪਰਿਵਾਰ ਦੇ ਸਮਰਥਨ ਵਿੱਚ ਆਏ ਇਨਕਲਾਬੀ ਲੋਕ ਮੋਰਚਾ ਦੇ ਸੂਬਾ ਪ੍ਰੈੱਸ ਸਕੱਤਰ ਸਵਰਨਜੀਤ ਸਿੰਘ, ਇਲਾਕ ਕਨਵੀਨਰ ਭਾਗ ਸਿੰਘ ਲੌਂਗੋਵਾਲ, ਤਰਕਸ਼ੀਲ ਆਗੂ ਸੁਰਜੀਤ ਸਿੰਘ ਭੱਠਲ, ਆਦਿ ਧਰਮ ਸਮਾਜ ਭਾਰਤ ਦੇ ਪ੍ਰਚਾਰ ਮੰਤਰੀ ਬਲਜੀਤ ਆਦਿ ਵਾਸੀ, ਭਾਰਤੀ ਦਲਿਤ ਅੰਬੇਡਕਰ ਸਮਾਜ ਦੇ ਜ਼ਿਲ੍ਹਾ ਮੀਤ ਪ੍ਰਧਾਨ ਵਿਨੋਦ ਕੁਮਾਰ, ਕ੍ਰਾਂਤੀਕਾਰੀ ਮਜ਼ਦੂਰ ਯੂਨੀਅਨ ਦੇ ਬਹਾਲ ਸਿੰਘ ਬੇਨੜਾ, ਪਿੰਡ ਦੁੱਗਾਂ ਦੇ ਨੌਜਵਾਨ ਆਗੂ ਸੰਦੀਪ ਸਿੰਘ ਨੇ ਦੋਸ਼ੀਆਂ ਨੂੰ ਤੁਰੰਤ ਗ੍ਰਿਫਤਾਰ ਕਰਨ ਦੀ ਮੰਗ ਕੀਤੀ।

ਕੀ ਹੈ ਪੂਰਾ ਮਾਮਲਾ-

ਜ਼ਿਕਰਯੋਗ ਹੈ ਕਿ ਪਿਛਲ਼ੇ ਮਹੀਨੇ 16 ਅਪਰੈਲ ਦੀ ਰਾਤ ਨੂੰ ਕਰੀਬ ਸਾਢੇ ਅੱਠ ਵਜੇ ਦਲਿਤ ਔਰਤ ਆਪਣੇ ਪਰਿਵਾਰ ਦੀ ਸੁੱਖ-ਸ਼ਾਂਤੀ ਲਈ ਕੁੰਨਰਾਂ ਰੋਡ ’ਤੇ ਬੇਰੀ ਦੇ ਦਰਖ਼ਤ ਹੇਠਾਂ ਦੀਵਾ ਜਲਾ ਰਹੀ ਸੀ। ਉਸ ਮੌਕੇ ਪਿੰਡ ਦਾ ਸਾਬਕਾ ਪੰਚ ਤੇ ਇੱਕ ਹੋਰ ਵਿਅਕਤੀ ਪੁੱਜ ਗਏ। ਉਨ੍ਹਾਂ ਵੱਲੋਂ ਉਸ ਦੀ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਗਈ ਤੇ ਉਸ ਨੂੰ ਜ਼ਾਤੀ ਤੌਰ ’ਤੇ ਜ਼ਲੀਲ ਕਰਕੇ ਉਸ ਦੀਆਂ ਨੱਕ ਨਾਲ ਲਕੀਰਾਂ ਕਢਵਾਈਆਂ। ਉਸ ਉਪਰ ਦੋਸ਼ ਲਾਇਆ ਕਿ ਉਹ ਉਨ੍ਹਾਂ ਦੇ ਖੇਤਾਂ ਵਿੱਚ ਟੂਣਾ ਕਰ ਰਹੀ ਹੈ।

ਕੁੱਟਮਾਰ ਕਾਰਨ ਉਹ ਬੇਹੋਸ਼ ਹੋ ਗਈ ਤੇ ਦੋਵੇਂ ਵਿਅਕਤੀ ਮੌਕੇ ’ਤੇ ਭੱਜ ਗਏ। ਪਰਿਵਾਰਕ ਮੈਂਬਰਾਂ ਵੱਲੋਂ ਉਸ ਨੂੰ ਸੁਨਾਮ ਦੇ ਪ੍ਰਾਈਵੇਟ ਹਸਪਤਾਲ ਦਾਖ਼ਲ ਕਰਵਾਇਆ ਪਰ ਮੁਲਜ਼ਮਾਂ ਵੱਲੋਂ ਨਿੱਜੀ ਅਸਰ ਰਸੂਖ ਵਰਤਦਿਆਂ ਉਸ ਦਾ ਇਲਾਜ ਨਾ ਹੋਣ ਦਿੱਤਾ। ਇਸ ਮਗਰੋਂ ਉਸ ਨੂੰ ਸਿਵਲ ਹਸਪਤਾਲ ਸੰਗਰੂਰ ਦਾਖਲ ਕਰਵਾਉਣਾ ਪਿਆ ਸੀ।

T & T Honda